Camilla

Kategorier:

Hei! Eg er lei av kjedeleg og sliten gang/trapperom, og er no klar for eit nytt maleprosjekt. Har vore superfornøgd med tidlegare råd frå dykk, og håpar på å gjenta suksessen. Området som skal malast er gangen i andre etasje, som fører inn til tre soverom og bad, samt trapp opp til andre og ned til fyrste etasje. Eg kunne eigentleg tenkt meg å male alt: golv, trapper, veggar (inkludert dører til innebygde skap som dekker heile langveggen) og dører, samt kanskje tak? Eg veit ikkje kor viktig det er med fargane i tilstøytande rom, sidan dette er som ei eiga avdeling å rekne, men eg har nyleg måla yttergangen i fargen Grå harmoni. Eg er ikkje framand for tanken å male i fargar som matchar denne (eller inkluderer denne), men eg kunne i så fall tenke meg også mørkare grånyansar. Eine veggen ved trappa ned til fyrste etasje har tapet som er kvit med blomstermønster i svart og mørk grå. Der trappa endar i fyrste etasje er det mørke fliser. I stova oppe (der trappa opp til andre etasje endar) er det lys parkett og veggane er kvite (anar ikkje kva farge, skal på eitt eller anna tidspunkt malast). Vil altså male ALT, så her er det berre å slå seg laus. Eg trur det kan bli veldig fint med rette fargar (og rett belysning), men akkurat no er det berre eit område ein passerer: veldig kjedeleg og ukult. Golvet er per dags dato malt i Varm grå, men dette synest eg er for lyst (det er dessutan veldig slitt). Elles har ingenting vore malt sidan vi flytta inn, for ti år sidan. Huset er eit 70-talshus, med eigentleg ganske kul arkitektur. Eg likar godt møblar frå 50-/60-talet, og har mellom anna ein kommode og eit speil med lampe i teak ståande i denne gangen. Eg er litt usikker på om tre bilete er nok til å få fram korleis alt ser ut, men håpar de får ei viss peiling. Eg er flink til å male, men ikkje så flink til å sjå kva som blir fint på førehand, så gler meg til råd frå ekspertar.