Irene

Kategorier:

Lister/dører/vinduer : Umalt panel

Hei! Eg skal pusse opp ei hytte ved sjøen, og treng råd til fargevalet, både til interiøret og eksteriøret. Hytta er frå 1975, og er typisk prega av furupanel som er noko gulna. Stova og kjøkkenet har open løysning med store vindaugsflater mot sjø og nokre øyer med mykje skog. Inne i hytta er det ein god del detaljar i ein mosegrøn beisfarge med ein god del gult i, som far min nok har miksa saman då han bygde hytta, og som eg ikkje har nokon namn eller ncs-kode på. Denne vil eg gjerne bevare, slik at dei nye fargane må spele saman med den. Eg har funne ut at S7020-G50Y truleg er den grønfargen som passar best til beisfargen, og vil gjerne male vindaugsdetaljar i denne fargen, inne og ute. 1) Kva eksteriørfarge kan gå fint saman med S7020-G50Y? Eg ser føre meg ein svartgrå farge (som svaberga utanfor), men veit ikkje heilt kva nyanse. Kan eg ha nøytrale fargar som S8000-N, eller bør også gråsvart-tonen ha noko gult i seg? I så fall: 1434 Labrador (S7502-Y) synest eg er for lys, og 734 Brunsvart (8501-G90Y) for svart. Finnest det noko imellom desse? 2) Eg vil også gjerne male ytterdøra i ein varm oransjefarge, har de nokon tips der? Inne i stova/kjøkkenet vil eg gjerne male den motsette veggen til dei store vindauga, og då vurderer eg den same grønfargen S7020-G50Y, eller kanskje ein blåfarge S5540-R90B. 3) Kjøkkeninnreiinga og sofaputene vil eg gjerne ha i ein mørk gråtone (kanskje ikkje så mørk som eksteriørfargen), kva nyanse kan passe saman med gulna panel, desse grønfargane og blåfargen? Det er høgt under taket, men sidan furupanelet i taket er gulna, er ikkje den effekten så tydeleg. Her vil eg dekke med finerplater som eg vil beise. Taket er kant i kant med detaljane i beisgrønfargen. 4) Har de nokon tips til lyse nyansar eg kan prøve å beise i som ikkje vil gjere veggpanelet og beisgrønfargen endå gulare enn den er? Gjerne i heilt lys grått eller noko slikt? Resten av panelet vil eg gjerne berre ha som det er. Elles tenker eg at stolar, puter, lamper og andre detaljar vert i blå-, grøn-, og grånyansane ovanfor, i tillegg til kanskje ein varm okergul/oransje (som tang og lav på svaberga utanfor). Soveromma vil eg gjerne male. Der er det også berre panel, og vindaugsdetaljane i S7020-G50Y. Sidan hytta er frå 1975, vil eg gjerne halde litt på fargeskalaen frå den tid, og har kreppsengeklede i kvitt med typiske oransje-, brun- og gultona blomstrar, i tillegg til oransje leselamper. 5) Har de nokon tips til lyse veggfargar som kan passe saman med dette? 6) Og kva kvittone bør eg eventuelt velje i taket? Til slutt eit spørsmål som ikkje har direkte med maling å gjere, men med fargar, så kanskje de kan hjelpe likevel: Eg har ikkje bestemt meg for golv enno, men trur det vert klikkgolv i kork, det same golvet i alle romma. Det finnest jo i alle slags fargetonar. Har de nokon tankar om kva som vil binde romma og desse fargetonane best saman: lyse eller mørke golv, varme eller kalde tonar? Tusen takk for all hjelp, denne bloggen og fargerådhjelpa er verkeleg gull verdt!